港股近期跌得深過人，彈力又弱過人，真係好難吸引好友入市博反彈。周二晚美股大幅回升，加上A股漸見靠穩，帶動昨日港股反彈，但未能升穿兩萬五關口，恒指以全日高位24,979點收市，升394點，主板成交增至1,063億元。
睇番昨日除科技股升得較實在外，藍籌升勢唔算太全面，事關單計滙豐控股（00005）、友邦保險（01299）、中國平安保險（02318）、騰訊（00700）及中國移動（00941）5隻權重股已貢獻共271點升幅，反映資金主要吼大藍籌，市底唔可以話全面轉強。
美國的科技及晶片股勁升，香港上市的科技股同手機設備股昨日當然借勢反彈，騰訊升5.8%，網龍（00777）、IGG（00799）升幅介乎3至5.9%；至於手機孖寶舜宇光學（02382）及瑞聲科技（02018）則分別升5.8%及4.7%，板塊氣氛回暖。
不過，考慮到早前美股急跌係由科技股引發，未來板塊進一步調整機會不能抹殺，所以今轉本港科技股即使出現反彈，隨時係「最後逃生門」，策略上宜守不宜攻！
今轉資金傾向「炒舊唔炒新」，新經濟股暫時唔好掂穩陣，因為一個反身可以輸得好甘。反之，部分舊經濟股起碼有實業支撐業績，買落都較放心，好似昨日升得唔錯的基建鐵路股就值得望望。
從基本面睇，中美貿易戰持續，市場早已憧憬中央將力推基建以減慢經濟放緩風險，加上基建鐵路股近幾年雖然積極「走出去」，但主要市場係發展中國家，受中美貿戰影響相對有限。同時，板塊業績持續改善，中國中鐵（00390）及中國鐵建（01186）剛公布的首三季度業績分別多賺18%及20%。
再睇估值，板塊早前隨大市調整過一輪，中鐵建、中鐵及中交建（01800）往績市盈率分回落到約6.8倍、8.4倍及4.6倍的吸引水平，細細注買落去個心都唔會亂。
大行瑞信指，中鐵建今年首九個月收入按年增加6.4%至4,898億元人仔，盈利則增20%，首三季業績達標，惟營運現金續呈負數，但考慮到估值平及盈利合理增長，故維持其「跑贏大市」投資評級，目標價12.4元，以現價計有25%潛在升幅。走勢上，中鐵建股價昨日重上10天及50天線，短期有勢挑戰52周高位10.76元，跌穿9.27元止蝕。
古勝