萬聖節剛剛過咗，大家可能仲擔心緊股市低處未算低，但金融市場嘅「萬聖節指標」，就預示入市時機又到喇，唔知你又信唔信呢？
美國著名財經網站撰稿人Mark Hulbert話，市場上所謂嘅「萬聖節指標」，即係由萬聖節（十月三十一日）開始，直至明年四月三十日呢六個月期間，持有股票嘅回報往往會跑贏其他時段。即係投資者大可以考慮「機械式」咁喺上述日子買賣股票。不過，今年由於十一月六日美國將舉行國會中期選舉，穩陣嘅投資者喺十一月初睇定形勢先入市都未遲。
另外，有周期理論教父之稱、著有《股市周期》一書嘅作者Jeffrey Hirsch話，投資者可以參考名為MACD嘅技術指標，確認十月或十一月初幾時入市，而又喺四月幾時賣出。MACD係一個短線動力訊號，反映移動平均嘅差距，俗稱「牛熊差距」，用嚟釐定買入及賣出訊號。
效果又點？據○二年中至一四年嘅回報統計，如果純粹「買入後持有」，平均年回報約7.2%，但要全天候承擔風險；如「機械式」喺四月三十日賣出，而又喺十月三十一日買入，回報約7.4%，不但較「買入後持有」略多，而且承擔風險程度較低，起碼有幾個月時間唔使擔驚受怕！若然再配合MACD參考買入賣出時間，回報更升至近9%。
至於一四年後若以美國標指計，一五年十月至一六年四月回報係-0.6%；一六年十月至一七年四月嘅回報就係12%；一七年十月同埋一八年四月嘅回報就有3%！而大家最關心嘅港股近兩年喺上述時段嘅回報亦分別達7%及9%。
余絲韻