Market Insight：重磅股等轉勢再考慮

好淡雙方明顯在角力，市況飄忽都好正常，不過，要在如此波動市況中搵食就好考技巧同心理質素，事關短期資金流向受氣氛影響甚大，兼且喺忽視基本面因素下，就算揀中心水股，隨時都落得輸錢下場。

市場避險需求升

恒指昨日最終跌96點收報25,249點，與兩萬五心理關口距離不遠，淡友只要輕輕加多腳就到。主板成交則回落到912億元，可能係顧慮中央短期有機會再出新招撐市有關。睇番滬綜指昨日最高見2,640點，一度重上熔斷底，可惜最終都企唔穩，報2,603點，一句講晒：市底弱就係市底弱！

港股今期都真係好惡炒，事關中央要救市之時，外圍就唔多對路，美股危危乎。美國十年期國債孳息率跌穿3.14厘，國際金價在1,230美元企穩，避險意識繼續升溫。單係咁睇，港股今次唔只係被A股拖累，仲要隨時被外圍投資氣氛左右！

個股的表現就好個別，好似港股晴雨表港交所（00388）早前已經升先大市一步，昨日續升0.6%，再跑贏大市。股王騰訊（00700）連續兩日10天線得而復失，未來守唔守得住前低位265元支持都係一個問題。

中資金融股作為今次反彈的主力部隊，但近兩日表現十分反覆，權重股建設銀行（00939）雖然收升0.3%報6.22元，不過日線圖成支長針，動力唔算太強，而其他三大行（中、工、農）則分別持平、升0.9%及升0.2%，股價表現唔上唔落，後市隨時又轉趨牛皮。簡而言之，港股整體市況陰陽怪氣，加上即市明顯缺乏方向，要做好風險管理先好入場，而已持貨者應調節好心理，到價就要嚴格執行止蝕/止賺。

大笨象滙豐控股（00005）下個星期一就公布第三季度業績，大行此前睇法都幾個別，好似花旗就下調其評級至「中性」，目標價下調至67.7元，以反映下調明年財年盈利預測及股本成本增加等因素；里昂則維持其「買入」評級 ，目標價89元。

沽空比率仍高企

事實上，雖然滙控密密回購，加上北水早前頻頻買貨，但股價都係彈唔起。再考慮到北水近日似乎已無影，反而沽空比率有上升趨勢，昨日滙控沽空比率高達50%，睇怕後市都要繼續落。再從估值考慮，滙控現時往績市盈率約16倍，息率6.4厘，市帳率約0.9倍，以一間業務平穩發展的國際銀行來說，確係有一定吸引力。最慘係，現時投資氣氛偏淡，市底弱兼且通街平貨，作為權重股反而成為負累，所以就算估值幾吸引，一日股價未轉勢向上，都係眼看手勿動！

古勝