香港持牌地產代理升至近四萬人嘅高峰，一手樓成搶客目標，有時激到打交。地產代理監管局出手，發出最新執業通告，要求代理搞好秩序。
新指引除咗強調代理行唔可以調派非持牌員工到銷售點，亦必須委任一名持牌至少十年，擔任管理職位至少五年嘅代理做總樓盤監督。監督獲委任前三年唔可以被該局紀律處分過，仲要喺一手樓盤銷售開始前最少一日，向地監局提供被調派到場員工嘅名單、指揮圖表等，仲要備存上班紀錄。
業界話會全面配合新措施。美聯物業住宅部行政總裁布少明指，總樓盤監督要求提升，公司好多同事都符合條件，影響唔大。
余絲韻