港股反來覆去無方向，昨日恒指高低波幅雖有413點，但主要係高開212點後反覆回落，恒指最終仍要跌7點報25,454點，主板成交877億元，整體淡勢未改。
A股就更加無眼睇，滬綜指昨日進一步失守2,500點關口，跌75點報2,486點，創一四年十一月以來新低，弱過藥煲，並成為港股後市繼續尋底的憂患。如果看官硬要古勝說出一個A股底部，咁只能說句「跌市莫估底」，總之處身熊市，逢高減磅及沽貨就是最值得做的事。
雖然中國逃過一劫，未被美國列入貨幣操縱國，但都未見好友趁機反擊，A股反而再穿底，港股又係陰陰落格局。從種種迹象揭示，仍留喺魚缸內的好友買少見少，港股後市即使有反彈，相信都係技術反彈居多，散戶最好都係少做少錯，唔做唔錯。
中港股市昨日齊齊無運行，或多或少與國際油價回軟有關。港股「三桶油」昨日跌幅介乎1.4至4.2%，主因美國與沙特關係未如想像中差，市場對油價因政治因素而急速抽升的憂慮大減，加上美國原油庫存連續五周增加，故令油價出現調整。不過，從基本面睇，油價中線升勢應可持續，如果三桶油再跌多浸，反而提供中線低吸機會，值得繼續關注。
至於其他個股表現好個別，其中港交所（00388）昨日失驚無神高開逾8蚊，但收市縮至僅升3蚊；至於隻騰訊（00700）臨近尾市雖然彈番多少，但仍要跌0.1%收市。淨係睇這兩隻指標股，都知道港股有幾飄！
騰訊彈唔起，其他科技股有乜風吹草動都係捱沽居多。睇到中金發表報告，預期金山軟件（03888）第三季將錄得虧損，將其目標價下調至21元。該股本來已拾級而落，而自十月起更有再展新一輪跌浪之勢，MACD熊叉擴闊，睇怕今次隨時要跌到落10元關先有承接。
古勝