絲絲講場：女首富楊惠妍身家縮百億
胡潤研究院發布《2018胡潤女企業家榜》，碧桂園（02007）副主席楊惠妍以1,500億元（人民幣‧下同）身家，第六次成為中國女首富，但佢身家比去年少咗100億元；龍湖集團（00960）董事長吳亞軍以585億元排第二，富華集團主席陳麗華以505億元排第三。
A股今年表現差，榜單顯示，前50名中國女企業家平均財富比去年跌7.8%至213億元。
六個「80後」靠父母幹上榜
喺榜單入面，其中就有6個屬於80後女富豪都係靠父或母幹！佢哋包括排第7位嘅龍光地產（03380）紀海鵬和紀凱婷父女，身家360億元；排第8位嘅達利食品許陽陽和陳麗玲母女，身家325億元；排第22位嘅泛海集團盧曉雲和黃球姿母女，身家180億元；28位嘅新希望集團劉暢和李巍母女，身家145億元；35位嘅歐普照明王穎和馬秀慧母女，身家120億元；38位嘅嘉鑫控股陳寧寧和呂麗母女，身家115億元等。
榜單又顯示，房地產和製造業係上榜女企業家嘅主要財富來源，上榜人數佔比分別係27%和17%，並呈上升趨勢。另外，榜單有13位女富豪新上榜，12位都係白手起家。好似得益早前來港上市，海底撈（06862）聯合創始人舒萍和李海燕就以125億元財富新上榜。
余絲韻