絲絲講場：做足25年「新股女王」鍾絳虹轉工？
投行界消息透露，有「新股女王」之稱嘅中央證券董事總經理鍾絳虹，將會離開工作咗廿五年嘅中央證券，暫時未知佢將會過檔去邊，但聽聞好大機會做番佢最擅長嘅新股相關工作。絲絲即刻打電話畀鍾絳虹求證，但佢就不願置評。
歷來只打過兩份工
唔講唔知，原來佢職場生涯中只係做過兩份工，第一份係響怡和集團做公司秘書助理，當時要聯絡過戶處提供股東名冊，經常要同中央證券打交道。
至一九九三年，佢就索性過檔到中央證券，由客戶服務經理做起，之後步步高升，做到總監、高級總監、交易管理董事，甚至董事總經理，一做就做咗咁多年。
推白表eIPO貢獻大
至於鍾絳虹「新股女王」呢個名嘅由來，皆因佢加盟中央證券之後，可謂見證香港新股市場嘅輝煌歷史，經佢手上市嘅新股可謂多不勝數，而絲絲近年對佢印象最深刻就係佢力推網上抽新股（白表eIPO）嘞，散戶從此認購新股方便得多。難怪近年佢人氣急升，被業界冠以「新股女王」稱號。
不過，所謂「天下無不散之筵席」，可能佢想趁住自己仲後生，想到出面嘅世界闖一闖，展開事業嘅另一章！
余絲韻