美股觸發環球大冧市，全球市場齊齊食咗「一日冚包散」，傳統十月股災月似乎已應驗，大家要扣緊安全帶！睇番昨日恒指一開已跌801點，最終跌926點收報25,266點，主板成交增至1,397億元。不過，港股都唔夠A股慘情，滬綜指跌142點，並失守一六年一月的熔斷股災低位2,638點支持。
講真，A股去到現水平，國家隊再出手可能已經無意思，因為已失守「熔斷底」，人心虛怯，即使有反彈資金都係沽貨多。同時古勝認為，中港股市急瀉，應該較人為出手撐市後，再陰陰落情況為佳，起碼知道短期見底後都有一段反彈浪可博。
大跌市下，全場焦點又係落在騰訊（00700）身上，要留意今次美股大插主要由科技股帶動，加上騰訊基本面已轉差，市場已預期集團第三季業績難有驚喜。最重要係，作為權重股加上「曾經係」北水愛股，若然內地要班水回朝，正路都係靠沽騰訊「救駕」，事關人仔匯價跌得幾急，相對以港元計價的騰訊自然成為「最有價值個股」。
港股處身熊市，必須做好風險管理，最起碼要識逆境求存，在下就提出三個求生方法畀看官參考！首先，若持股已中止蝕就要忍痛執行，千萬唔好溝貨，以免愈溝愈淡，難以翻身。
其次，雖然恒指愈跌愈深，又唔知個底喺邊，不過講到尾，股市長線始終係會反覆向上，加上從恒指月線圖觀察，現時9月RSI已跌至33，故有意投資的初學者，不妨以月供股票方式入市，如以平均成本法買盈富（02800）。
最後，如果認為個市仲有排衰，但手癮又好大的話，亦可利用反向ETF作看淡或對沖大市之部署。近日見FI南方恒指（07300）、FI未來恒指（07336）以及FI三星恒指（07312）等表現唔錯。當然，港股波幅擴大，短炒只宜小注。
古勝