絲絲講場:恒生「分行一姐」年底換班

近排秋風起,銀行界都靜雞雞刮起人事變動風潮。絲絲收到風,有「分行一姐」之稱嘅恒生銀行(00011)分行網絡業務主管譚麗琼(Peggy)會喺今年底退休,嚟緊新一姐個位會由內部晉升,聞說會由商務理財業務總監袁妙齡(Wendy)坐正。

MT出身 袁妙齡接任

原來Wendy係由管理培訓生(MT)出身,九六年已經加入恒生,都可以話係恒生嘅親生女,佢咁多年嚟都做過唔少重要崗位,零售銀行及財富管理、甚至商業銀行業務,佢都曾經參與其中,嚟緊會負責關於零售網絡嘅銷售同埋服務。

聽講Wendy嚟緊會向關穎嫺(Margaret)匯報,即執行董事兼零售銀行及財富管理業務主管。心水清嘅讀者應該唔難發現,以上提過嘅三位主管都係女性,其實恒生近年上位嘅一班Top Team(高級管理層),唔少都係女將。

呢幾日政府頻頻呼籲上市公司多啲委任女性擔任董事局成員,女將輩出嘅恒生,13名董事會成員當中,有5位係女性,比例達38%,比起政府所設嘅35%目標,明顯超額完成。

余絲韻