絲絲講場：哈佛大學投資講就叻
哈佛大學基金表示，截至六月三十日止一八財年投資回報錄得10%。但同期道指和納指升15.42%同21.07%。而與同處馬薩諸塞州劍橋市嘅麻省理工學院（MIT）比較，亦輸畀MIT同期嘅13.5%回報。
重注Apple 回報輸大市
期內，哈佛大學基金資產規模雖然達到創紀錄嘅392億美元，但過去十年投資表現每況愈下。而哈佛大學基金由哈佛管理公司經營，公司回應指，基金係投資轉型嘅初階段，將來有好多嘢要做。
值得一提，哈佛大學基金喺一八財年就首次大量買入蘋果公司（Apple Inc.）同微軟等科技股，共涉資8.16億美元，最重注喺Apple，佔總金額嘅72%。但回報依然跑輸大市。
余絲韻