絲絲講場：騰訊搞炒股擂台考驗自己？

由港交所（00388）和深交所聯合指導，騰訊新聞及騰訊證券主辦嘅《2018年港股通模擬投資大賽》於十月八日開賽，由富途證券提供技術平台。比賽進行十周。而內地十一假期期間，內地股民已可透過微信或QQ個人戶口報名。

還記得深港通係一六年十二月五日開通，而深港通嘅南向投資港股通，係內地投資高手大展拳腳嘅渠道，目前港股通有417隻股票可供選擇，一眾香港知名股票都包含在內，騰訊控股（00700）更曾經係「大媽」重磅愛股。

但騰訊今年沽壓沉重，市值累計蒸發一萬億港元，「大媽」都沽唔少貨！今次騰訊主辦港股通模擬投資大賽，睇怕參賽者必定全力比試炒藝，到時唔知會唔會揀騰訊出手呢？不過咁，港股通雖可借孖展，但係唔可以沽空嘅！

獎金方面，主辦單位指已準備好百萬元（人民幣‧下同）總獎金，每周收益率前3名選手可獲得5,000元、3,000元、2,000元現金獎。決賽冠軍、亞軍和季軍將獲得15萬元、10萬元、5萬元現金大獎，並獲頒獎盃和證書。

不過，今次大賽最有特色係特設大學賽區，是次大賽主導方之一嘅港交所和騰訊，將會向優秀大學生選手提供實習機會！

余絲韻