周三晚道指升158點，但港股昨日繼續選擇跟A股走，滬綜指先升後跌，收市跌1點，雖然跌得唔多，但就影響到港股氣氛，恒指昨日升70點報27,477點，主板成交868億元。
呢排個市有幾點值得留意，首先，大市跟A股多過美股，如果A股今日繼續係無乜力，相信港股亦會拉牛上樹，加上臨近周末及下周二假期，好友入市意欲又會減弱；其次是，港股通（滬/深）由周四至下周二暫停，對港股成交有一定影響。
最後一點，就係由標準普爾道瓊斯指數公司和MSCI聯手開發指數的全球行業分類標準（GICS），即將迎來股市廣泛行業板塊有史以來最大的調整，由於大型基金將被迫調整倉位，環球股市短期轉趨波動機會增，大家要做好準備。
恒指由低位26,219點反彈至昨日高位見27,628點，累升逾1,400點，見有部分權重股要抖抖氣都好正常。反而，大市短期已累升咗唔少，但某啲板塊就彈極都彈唔起，咁後市都真係可以放埋一邊，好似醫藥股就係其中一員。
染藍後仲未威過的中國生物製藥（01177），早前連彈兩日後昨日回吐1.5%，至於無盈利的生科公司歌禮製藥（01672）更要瀉3.9%，連炒味一向較濃的金斯瑞生物（01548）亦跌2.4%，可見板塊依然向淡，試問資金又點會揀「跑輸大市」的醫藥股呢？
此外，第2隻同股不同權新股美團點評（03690）昨日掛牌，最終報72.65元，較招股價69元高約5.2%，每手帳面賺365元。
雖然集團係中國市值前三甲的獨角獸之一，不過香港的公開發售部分僅獲得0.5倍超額認購，即係有入飛者人人有份，開頭都驚市況唔好，佢未必炒得起，但首日股價表現算唔錯。反而大師兄小米集團（01810）就繼續潛水，昨日股價跌0.4%收報16.48元，從走勢上看，八月中低位15.52元已成短期支持，但唔跌亦唔代表會升，而美團話晒新鮮出爐，資金或會「炒新唔炒舊」。
古勝