絲絲講場：山東黃金招股書歷來最重磅

話說尋日開始招股嘅山東黃金礦業（01787）嘅招股書，內容多到，中、英文版都各要分三冊，即合共六冊。齋咪中文嗰三冊要睇3,017頁，連英文版溫埋就合共超過6,000頁！

中英文版六冊合共22磅

6,000頁有幾厚？一冊厚4cm，疊齊六冊即是24cm高！先唔講揭嚟睇，就講拎都已經好甘，一冊重約1.65kg，全套六冊重達10kg（約22磅），即是大概一個1歲人仔咁重！仲唔係史上「最重磅」嘅招股書！

絲絲查番以往招股書「最夠分量」代表，當中喺今年初取消香港上市地位嘅嘉能可（Glencore），招股書逾1,600頁當時已經創紀錄。而同行紫金礦業（02899）同招金礦業（01818）嘅招股書，都係分別得489頁同592頁，家吓山東黃金礦業足足厚佢哋幾條街。

招股書成本每份萬萬聲

點解要咁厚？公司話，因涉及資料多，要嚴謹做披露，所以招股書內容較多。睇番原來第二冊同第三冊都係附錄，披露公司12個礦場嘅資料同報告。

雖然公司無透露今次招股書製作費佔咗公司上市費用幾多，但絲絲八到，新股上市閒閒哋都要印三、四百本招股書，集資規模大啲仲要係千本起跳，而由頭到尾計平均製作100本招股書嘅總成本就要成200萬元，家吓山東黃金礦業一本等於人哋三本，條數咪……唔通做金礦真係豪啲嘅？

余絲韻