絲絲講場：朱仔唔輸得 啄住小妹妹攞彩

朱仔份人點，佢啲對手最清楚。Twitter前行政總裁科斯托洛（Dick Costolo）形容朱仔係「無情嘅執行機器」，「一畀佢啄住，實會被佢揼鑊甘！」

寫程式幫手誓要玩贏

LinkedIn創辦人Reid Hoffman亦講過，咁多年嚟，朱仔都擺出個「就算大家Friend，都要保持距離，事關我要打冧你」嘅姿態。估唔到，佢連個妹妹仔都唔放過。

話說幾年前，朱克伯格呢位億萬富豪有次喺私人飛機上，同朋友個囡囡玩Scrabble解悶。Scrabble係個英文字Board Game，玩法係將手上有限嘅英文字母，鬥多拼出英文詞彙，即係鬥識得多英文字。

點知，朱仔第一局就輸畀呢個中學生妹妹！佢唔忿輸，即場寫個程式出來幫自己砌出所有詞彙組合，誓要第二局贏番個妹妹！回憶嗰日，個妹妹話：「當時旁邊所有人分成兩派，一邊撐人類，一邊撐程式。」

結果邊個贏？冇得講，事關呢局未玩完，架機就到埗冇得繼續，不過聽講臨停機時，朱仔加埋佢個程式，都只係微微領先啲啲咁多。真係多得架機啱啱要降落，否則一旦朱仔有程式幫拖都仲輸畀妹妹，都好難睇吓！

余絲韻