Market Insight：跟炒消息 有胡要即食

港股淨係望住騰訊（00700）同滙豐控股（00005）經已周身唔聚財，上周北大人話擔心兒童青少年近視問題，而實施網絡遊戲總量調控，騰訊被再踩多腳，昨日再裂口下跌，最終跌2.1%報332.8元，短期一旦失守八月前低位319元，相信見300元唔需要太耐時間。

兩大藍籌唔多精神

至於大笨象，走勢明顯一浪低於一浪，昨日股價跌0.7%報68.35元，創52周新低。咁早前說好的受惠加息周期，淨利息收入業務可望增長等炒上誘因呢？相信資金已等唔切先行沽貨！簡單講，大家純睇兩隻權重股，都會知港股走勢唔多老利！

唔信咁差？再睇埋板塊大勢。中資金融股佔指數比重咁多，部分內銀及內險股早前雖作勢反彈，但同個指數一樣，近幾個交易日普遍升唔上，內銀方面，建設銀行（00939）低位橫行，一向炒味叫較濃的工商銀行（01398）又係彈唔起。

至於內險股，中國人壽（02628）走勢級級落，中國平安保險（02318）叫做好少少，但短期守唔穩75元支持，隨時又再落過，中國財險（02328）八月中失守升軌支持後乏力反彈。大媽至愛的中資金融股同騰訊都炒唔上，照咁睇，點會有人相信北水可再撐起港股？

近排古勝提過，資金專揀高估值或累升幅度甚多的板塊沽貨套現，昨日物業管理股又再成為目標，中奧到家（01538）下跌7.4%、中海物業（02669）、彩生活（01778）及綠城服務（02869）則分別跌3至6%。既然板塊氣氛咁差，未有貨者當然咪掂住，就算有貨見反彈都應該減持而唔係再買來溝。

光伏股升勢恐短癮

事實上，就算行業有利好消息，但都未必係一個高追理由，好似昨日逆市呈強的光伏股為例，雖然市場熱炒歐盟宣布對中國光伏產品的反傾銷和反補貼措施將於昨日到期後終止，並令相關股份升得且急且勁，卡姆丹克太陽能（00712）就最狂，大升45.8%報0.105元，陽光能源（00757）及保利協鑫能源（03800）都升逾一成。

不過，所謂前車可鑑，早前升過一輪的板塊如今已成沽貨對象，加上光伏股以往炒作時間經常好短癮，看官短炒冇話唔得，但係要有心理準備資金「來去如風」，有胡要即食，見勢色唔對或者中咗止蝕位，就要嚴守紀律，捨得止蝕先好入場。

古勝