你有冇商業頭腦同屋企嘅喵星人有關！係美國最近研究話嘅。準確啲講，係同貓咪便便嘅寄生蟲「弓形蟲」有關，人接觸過含蟲嘅貓便便，就有機受感染。受感染嘅，大學生就偏向主修商業，專業人士就多有創業傾向。
研究搵1,495個分別主修生物與主修商業嘅大學生，發現對弓形蟲檢測呈陽性反應（即有抗體，代表受感染過）主修商業嘅學生高1.4倍。而商科生中受感染者專攻更搏嘅管理及企業（對比穩陣嘅會計），又比冇受感染者高1.7倍。
研究團隊又另外搵咗197名參加創業活動嘅商界專業人士，發現真係白手創業嘅，受感染者比冇受感染嘅高1.8倍。佢哋仲統計42個國家過去25年嘅數據，發現高感染率嘅國家，當地人創業嘅比率亦較高！
結論係，人類染上弓形蟲後，個人行為及決策的確會受影響。該研究論文嘅第一作者兼科羅拉多州博爾德大學商業系教授Stefanie Johnson估計，可能係影響咗人體內嘅分泌，減低咗恐懼，於是會更冒險喎。至於實際係點，有待進一步研究咁話。
余絲韻