絲絲講場：學懂盤房銀碼術語 夠霸氣!

呢啲原來都係銀行盤房嘅行內術語，仲有「碼」、「骨」同「腳」，你識唔識？光大銀行香港分行總經理兼聯席主管顏劍文逐個拆解畀絲絲知。

「球」對上跳到去「碼」

先講「盤房」，銀行嘅交易室就俗稱「盤房」，係交易員利用銀行資金買賣不同金融資產嘅地方，交易類別包括外匯、債券、利率、衍生金融工具等，交易金額動輒以千萬元計，於是發展出唔同量詞嘅術語。

盤房之內，「球」即係100萬。顏劍文拆解，「球」之上就係「碼」，即係1,000球或10億嘅意思，量度單位來自美式英語1 Billion。

至於「球」下面，仲有「骨」同「腳」。「骨」即係四分之一球，交易員講「一個骨鎊」，就即係25萬英鎊。至於「腳」就係十分之一球，即係10萬，如果有交易員話「兩隻腳Euro」，就係20萬歐元咁解。

點解要咁講法？交易員用術語去「做刁」（Deal嘅諧音，交易也），唔單止為增效率，仲要夠霸氣！顏劍文就以講「100萬」為例，講出嚟「溫吞無力」，但講「一球」就唔同喇，夠快夠勁！

佢仲話，呢啲金融人「母語」唔淨止用喺交易金額，有啲仲係香港人早期用過，例如佢小時候就會用「兩點一個骨」形容時間，即係2點15分咁解。

嗱袋好「碼」、「骨」同「腳」，以後莫再淨識得講「球」一味喇！

余絲韻