絲絲講場：孫宏斌講賣樓 寸絕全行
融創中國（01918）尋日業績會，點少得董事長孫宏斌嘅豪言。佢之前話唔爭行業第一，以合約銷售額計，佢公司今年上半年暫排第四。孫總話未諗過超前，事關「大家都學我們」！佢話，包括併購、布局同產品，融創都係行業學習榜樣。咁自信？！原來好多發展商老闆都買融創嘅樓、住佢哋嘅小區，即係品質有保證。
唔講樂視賈躍亭
孫總話，收購「吃很多虧才有口碑」，唔通講緊之前投資樂視？不過孫總今次唔講樂視同賈躍亭，只係話對樂視態度不變，叫人睇公告。被問到點睇中國恒大（03333）投資樂視FF汽車，佢似乎唔高興，淨係話唔了解！
孫公子孫喆一舊年入局，尋日無現身，佢用八個字評價阿仔：「不知道他在幹甚麼」，就交波畀公司秘書兼副總裁高曦，皆因阿仔喺高總手下做嘢。高總話：「負責戰略投資的他非常投入、有非常大作用。」幾咁客氣。
融創半年賺63億
業績方面，融創半年賺63.61億元（人民幣‧下同），按年增2.87倍；每股基本盈利1.45元，唔派息。公司將堅持一、二線城市及環一線城市布局不變，地產與文旅雙線發展。
余絲韻