絲絲講場：盤房行家食飯例埋兩次單

銀行交易室俗稱「盤房」，係交易員利用銀行資金買賣不同金融資產嘅地方，交易類別包括外匯、債券、利率及衍生工具等。

高手過招 估張單幾錢

盤房鑊氣盛，Dealer賭性重！顏劍文話，交易員要生存，就必定要有View同Ego（自我），所以凡涉及數字嘅嘢，喺交易員之間都會發展出「鬥View市場」，連食飯都要真金白銀鬥一餐。

佢描述成班盤房行家飯局，交易員之間會估實際幾多錢埋單，假設有人估500蚊埋單，若有人認為個數唔止500蚊，就會出價同估500蚊嗰位交易員對賭，然後「報價」（估餐飯嘅埋單價）就會上升，升到某個位又會賭番落嚟，直到交投同報價「平衡」。

結果每餐飯埋完真正張單之後，大家就會為剛才「市場交易」埋多次單，顏劍文就形容交易員食飯都相當攰，但永遠樂此不疲。

佢仲話，廿年前交易員仲流行估戲院票房，至今唔少得當然仲會估樓價、估股價。佢哋最緊要一樣嘢：有View唔一定贏，不過無View就一定輸咁話！

余絲韻