絲絲講場：喬布斯Vs庫克 邊個堅啲？

已故教主喬布斯多人崇拜，但市場亦有唔少評論話，冇庫克，Apple就冇今日喎。

唔似得喬布斯係夢想家，庫克係「貼地」型。九七年喬布斯強勢回歸後，佢就睇中庫克熟悉生產同營運，由Compaq撬佢返嚟。當時Apple成功簡化產品線、減少積貨等，庫克功不可沒。

庫克接棒後股價勁飆

庫克一一年接棒以來，Apple股價升咗三倍。早兩年iPhone銷售增長放緩，公司收入同市值都冇拖慢，就全靠庫克主政將重點轉放貴價穿戴配件、軟件與服務，同埋提高iPhone定價，架Apple列車先可以繼續衝，仲裝滿Cash添。

上季Apple業績，直頭係庫克嘅個人成績表。佢主攻嘅服務包括Apple Pay、Apple Music、App Store同iCloud等，收入升31%；而佢大搞嘅穿戴設備，好似Apple Watch與AirPod等，收入勁增37%。

喺庫克掌舵呢六年半以來，Apple成為市場奇珍，事關冇乜公司去到呢個年紀仲可以Keep住價值不斷增長！難怪公司前CEO John Sculley早排亦開口讚：「庫克所做到嘅，已經超越咗喬布斯。」

喬布斯掌舵勝在夠膽

不過亦有人勁踩庫克冇膽，搞到今時Apple宣傳好「雲呢拿」，即係原味雪糕咁，平凡到無厘性格，同喬布斯嗰時差天共地！柴台嗰位確實夠晒資格，佢就係當年一手搞出Apple經典廣告「Think Different」同埋為「iMac」命名嘅著名廣告人Ken Segall，之後Apple產品一路「i」落去之唔係因當年有佢！難怪可以咁擲地有聲。

好喇，睇到呢度，你揀喬布斯定庫克？

余絲韻