Market Insight：業績股炒落易過炒上

若單純睇指數，或者以為唔係好嚴重，但實情係指數其實未反映港股市底「弱過藥煲」的真相。事關昨日科技股跌幅驚人，其中騰訊控股（00700）下跌3.4%，金山軟件（03888）跌18.8%，舜宇光學（02382）都瀉24%，大戶沽貨手起刀落，絕不手軟。

其實大戶的「洗白白」工程已經唔係一朝一夕之事，好似早前受人仔貶值打擊的內房與航空股、受假疫苗事件拖累的醫藥股、因內地收緊行業監管而閃跌的教育股，以至昨日因舜宇業績遜預期及金山軟件（03888）發盈警，借機「散水」的科技股。古勝早前已不時提及，股民逢高減磅及增持現金，實為處身熊市的港股中最為實際之做法。

人仔貶值影響浮現

舜宇昨日跌逾兩成收報91.9元，唔講仲以為佢係細價股。雖然話集團今年頭六個月收入增加約19%有119.76億元人仔，不過盈利僅按年增1.77%至11.79億元人仔，難怪資金先走為敬。大摩出報告指，舜宇中期盈利低於該行預期的9%，主因是緊湊型攝像頭模組（CCM）毛利率僅9.4%；另上半年純利低於該行預期，主要是期內錄得一次性約2億元人仔匯兌虧損。

其實業績差炒落好正常，反而值得關注的是，年內人仔貶值對港股內以人仔作為主要收入的企業，未來會否好似舜宇咁出現匯兌虧損而引致盈利下降，尤其是七月至今人仔仍在貶值的軌道上，類似地雷隨時陸續引爆！

至於騰訊亦「愈跌愈傷心」，一旦跌穿前低位340元又係尋底格。睇番幅日線圖，去年十一月至今營造的複式頭肩頂都幾明顯，加上八月十日彈過上頸線376元水平後未能再重返其上，顯見該位已成重大阻力。再睇埋周線圖，後市隨時要跌到落300元心理大關先識停，真係唔好手多住！

體品股績佳照被質

其他業績股方面，李寧（02331）周一公布佳績後昨日股價即市最多升7%，惟尾市升幅收窄至1%，日線圖呈倒轉錘頭；另同業安踏體育（02020）雖然派出一份理想成績表，但股價就大玩過山車，即市由升轉跌一成收市，睇怕兩隻體品股都係追唔過。

績優股都撐唔住，更何況做「伸手牌」？光大國際（00257）昨日公布業績的同時，宣布大折讓供股，建議27供10，集資近百億元，結果股價大跌21%收市。值得留意，雖然話集團業績幾好，不過無端端喺家陣集資，真係想到頭爆都想唔通點解。不過，若從陰謀論的邏輯分析，似乎唔係表面咁簡單，建議勿認叻博反彈。

古勝