絲絲講場：香港細路半數唔覺錢重要
投資者教育中心就「香港家庭的金錢觀念」發布調查顯示，香港嘅家長高估子女對家庭收入及開支嘅理解；小朋友對於金錢嘅概念同認知亦遠低於家長預期。講得白啲，即係香港嘅小朋友唔知米貴！
僅45%家長有教理財
調查顯示，87%受訪家長認為自己係小朋友嘅理財好榜樣。比如，家長指自己唔胡亂花費（80%）、有儲蓄習慣（72%）同埋有格價習慣（56%）。不過，僅有14%小朋友認識家庭開支需要，亦只得38%小朋友理解佢哋嘅教育同課外活動要花錢開支。
投資專家認為，咁情況係由於喺討論金錢及傳授理財技巧方面，只有45%受訪家長有抽時間同子女討論，47%家長有向子女展示開支帳單。
對於金錢觀念，調查顯示，89%家長認為金錢相當重要，但只有49%受訪子女有同感。84%家長認為子女對於父母嘅工作有基本認識，實際上只有67%小朋友表示了解父母嘅職業。
余絲韻