絲絲講場：高盛前一哥失業有乜好做?

搵工之餘 為妻挽鞋

離開咗白宮呢個熱廚房，佢話而家有三分之二時間用嚟打Golf，無任何董事職位喺身嘅佢亦不停打電話，睇吓有冇再展拳腳嘅機會，仲研究緊跟住做咩。

不過，科恩「失業」期間都唔愁寂寞，不時四圍去旅遊之餘，又會陪太太出席活動、幫太太挽住對準備上台時着嘅鞋。佢亦趁機發掘投資機會，簽訂咗投資協議，佢冇透露具體投資對象。

另外，科恩仲寫緊回憶錄，紀錄佢喺華府工作嘅點滴。佢直言自己促成咗美國嘅稅務改革，係31年來從冇人做過，似乎對呢件「功績」相當滿意，仲話雖然稅改未必完美，但做咗件咁重要嘅事，提高咗美國嘅競爭力，已經係好事。

為咗寫回憶錄，佢話要對住部錄音機不停講，段錄音可能長達幾千個鐘。但一講到對關稅嘅睇法，科恩即時耍手擰頭。抖咗一排，科恩太太話佢自從中學以嚟從未試過咁得閒，科恩就形容呢段日子美好，而一大得着就係Golf技術好咗。睇嚟佢都幾Enjoy呢段悠閒時光。

余絲韻