絲絲講場：證券界宴請史美倫勁多訴求
證券界尋晚有盛事，話說立法會議員張華峰聯同香港金融服務界十一個組織，喺金鐘一間酒樓大排筵席，祝賀史美倫做香港交易所（00388）主席。之不過呢排個股市表現咁差，成交又奀豬豬，業界咁難得見到新主席，應該有好多訴求啦！
筵開15圍 11組織輪流發言
原來史美倫今年四月底上場後冇耐，就同證券業界食飯加強溝通，所謂「禮尚往來」，今次輪到業界請番史美倫，規模仲大好多，上次只有兩圍，今次多達15圍。當每圍有12人計，即有成180人出席，認真大陣仗！
今次搞手之一嘅張華峰就話，十一個組織嘅會長可以輪流上台講一至兩分鐘，表達佢哋嘅期望。而佢自己就坦言對史美倫有好大期望，因為史美倫一向有金融界鐵娘子稱號，做過中證監副主席，同內地關係好，好希望史美倫未來能打開更多互聯互通，好似ETF通（交易所買賣基金）、南向債券通同新股通等，等香港金融服務界有更多商機，亦希望可令港交所業務更上一層樓，股價屢創新高！
嘩！業界嘅願望清單（Wish List）都好長喎！咁又係，近排香港同內地因爭取新濟經公司上市競爭白熱化，W股（同股不同權）入唔到港股通更令好多人大跌眼鏡，所以業界好希望史美倫可以憑住其同內地關係，令中港合作更密切。
不過，張華峰就笑笑口話，尋晚係祝賀佢做主席，唔係要佢交成績表，「畀佢開心一晚，唔係逼交功課！」好多嘢係要慢慢來的，況且近期貿易戰升溫，有好多嘢都唔係港交所可以做主動。咁又係嘅，初次大棚人見面食餐飯，唔係擺鴻門宴咁交關吧！
余絲韻