絲絲講場：專家教畢業理財第一課

1.第一次出糧 開定兩個戶口

投入社會大學，絕對同你之前嘅兼職或暑期工唔同，至少每月收入厚咗。專家話，要預先詳細列出每月必要同非必要開支，一定要計到條數有錢剩。之後開兩個戶口，係出糧戶口同投資戶口，將每月出糧戶口使剩嘅「閒錢」轉去投資戶口，而投資戶口嘅錢只可用作投資，否則絕對唔會攞出來。

如果出糧戶口長期唔留餘錢，可令心理上想減少非必要開支；唔准由投資戶口隨便提錢，就可強迫自己多作投資。

2.第一次租屋 勿超收入三成

有咗自己嘅收入，自然想脫離父母過獨立生活。萬事起頭難，未有能力買樓亦可租住先。

不過，每月住屋開支切忌高於收入嘅30%，因為除咗交租或供樓，仲有好多意料之外開支，如電器壞咗、家具爛咗，以前有阿爸阿媽喺隔籬，你未必為意呢啲開支原來咁甘。所以，若然交租或供樓開支高過收入嘅三成，就要將呢個「第一次」押後！

3.第一次買車 應先考慮二手

未有能力搬出來住，可考慮先買架車，享受吓流動嘅「個人空間」。不過，車款變得快，買咗幾年，車款已舊到想換，但可能仲未供完，所以唔好為追款而買，應考慮二手車，到收入去到咁上下，先買架新車去威。

4.第一趟還債 咪揀最低金額

好多人一畢業就要開始還學生貸款。千萬唔好為貪每月低啲還款額就延長還款期，會影響前途，事關長期孭住筆債，為還債可能會被迫放棄收入唔太穩定但極有前途嘅機會。

5.第一次拍拖 交換理財心得

人大咗，開始考慮身邊有個穩定嘅長期伴侶，莫講話結婚，即使拍拖亦須同另一半先「講錢」。

唔係唔信對方，而係既然諗住「二合一」，好多嘢都需要知道邊個負擔，又或者原來另一半負債纍纍！唔好因尷尬而避講錢，否則後果不堪設想。

余絲韻