中美貿易戰再度升溫，中港股市昨日風聲鶴唳，滬綜指挫2%報2,768點，恒指跌2.2%報27,714點，失守前橫行區底部兩萬八支持，主板成交增至1,072億元，沽壓加重！
美國一如預期維持利率不變，但利率期貨顯示，市場基本上認定九月必然加息。如今環球投資氣氛麻麻，資金屆時會唔會聽到「加息」兩字就借機炒落，大家要有定心理準備。
睇番今次中美貿易戰，中國一直捱打，唔多見出招，只專注內地實體經濟，如谷內需與搞基建。另以往每逢危急關頭，內地往往會出手穩定樓市，但中央近期繼續釋放出加強調控訊息，堅定去槓桿及遏制房價上漲。照咁睇，中國的內憂遠比表面上嚴重。
跟手望埋A股三大指數滬綜指、深成指、創業板指數以至香港國指，若以年內高位計，至今累跌幅度均逾兩成，技術上已確認轉熊，中港股市走勢都係瓜多過菜。
昨日騰訊（00700）成為焦點，最終跌2.8%報345元。自從南非大股東減持後，騰訊股價就開始逐步轉弱，且近期跌勢轉急。集團將於八月十五日公布中期業績，過去投資者往往喜歡在騰訊公布業績前短炒一轉，但今時唔同往日，港股市底差成咁，今轉都係咪手多。
市場好消息欠奉，一個壞消息足已震散整個板塊。內地七月重卡市場累計銷售7.7萬輛，按月大跌31%，數據拖累中國重汽（03808）及濰柴動力（02338）昨日大跌14%及11.9%。雖云以往炒數據表現，無論好壞都唔會炒太耐，但奈何港股氣氛太差，目前並非人棄我取的時候，最好眼看手勿動。
古勝