絲絲講場:大行鬥搞Camp搶先箍實富二代

大行搞夏令營(Summer Camp)幫你教仔教女,學做個「似樣」嘅有錢人!住紐約四季酒店,有堂上、有分享、有嘢學,食晏時有美國搖滾樂手Jon Bon Jovi個仔教品嘗冰凍Rosé,玩足三日!

歡迎嚟到呢個瑞銀一年一度嘅超級富貴夏令營,今年招呼咗由世界各地飛來嘅52位富二代,來自七個家族,平均年齡27歲。

專人教投資 慈善玩樂

就算真‧富有,佢哋亦要學做個「似樣」嘅有錢人,點叫「似樣」?識講錢、識歎、識玩就梗,營內有專人教投資、教品酒、同你講F1超級賽車。咁都未夠,年輕財俊冇啲Tech嘢掛口邊點得?於是有硅谷猛人同佢哋Update吓創新科技與融資情況。

大會仲安排各位少爺小姐抬住20L油桶嘅水行一英里,感受吓落後地區缺水擔水苦況,學吓做慈善。辛苦擔完抬完,即刻帶隊去城中蒲點歎番杯Cocktail呵番,然後再每人一副VR(虛擬實境)眼鏡,轉場再玩過。

第二日,個Camp就會以成班少爺小姐名義捐錢去建水井。發財立品有晒功課交,富爸富媽今次仲唔老懷安慰?

錯過咗瑞銀六月搞呢營?放心,摩根士丹利(大摩)、花旗同瑞信一樣都有。花旗嗰個教埋點因應各地不同法例去處理遺產安排;大摩就教Personal Branding執靚個人Package,仲有扮晒美國創業真人騷《Shark Tank》嘅競賽環節添!

要求戶口有千萬美元

班富二代玩得開心,識到班同Grade嘅「自己友」,啲大行仲幫佢哋搞埋「舊生會」廣結人脈,日後齊齊去蒲、拍拖或互相投資,各適其適。

搞咁多,大行無非想將公司招牌深深烙入班富二代個心,鬥早箍客。

想仔女入Camp學做有錢人?閣下戶口唔該至少有千萬計美元,留意番,係至少。

余絲韻