絲絲講場：郭台銘鞭策員工做錯嘢要罰企
新款iPhone會喺今年秋季發布，按慣例，依家已開始籌備生產新手機。聽講富士康鄭州工廠請緊新員工，老員工如果續約，仲可以得到2,000蚊人仔做獎勵。
富士康喺內地多達七十萬員工，董事長郭台銘究竟點管理咁大批員工？佢近日接受內媒訪問，就大談管理員工嘅心得。其實郭總一向出名對員工要求嚴格，佢笑自己個人心直口快，由一齊創業嘅高層老員工到年輕員工，做錯嘢一律要被「罰企」。
誠信為本 帶頭衝
人哋話佢嚴厲，郭總就回應指，咁樣做係希望員工能夠做得比自己更好。他笑言，希望員工能夠跳兩米高，如果他只跳一米八，達唔到期待就會捱鬧。不過，郭總坦白話自己做唔到嘅，都唔會要求員工去做。
好似佢要求員工去罰企，99%嘅時候自己都會陪埋罰企，佢話，走出實驗室就冇高科技，只有執行嘅紀律，呢個係製造業嘅現實。「我帶頭刻苦耐勞衝在前面，員工也不好意思不往前衝吧！」
對於被問到有乜經商以至做人之道可以寄語年輕一代，郭總就話，最希望可以傳輸畀下一代嘅價值觀就係「誠信為本」，呢樣亦都係富士康可以做到今時今日咁大規模嘅原因。
余絲韻