Market Insight：科技板塊轉弱 後市冇運行

周三Facebook收市後交易時段股價大跌兩成，影響本地科技股氣氛。騰訊（00700）近期已唔多精神，北水持續沽貨下走勢跑輸大市。最大問題係騰訊佔恒指比重高達一成，佢升唔起，指數又點會抽得上。古勝最驚係，美國科技股估值一向唔平，早前美股升浪其實都靠晒佢哋，萬一科技股出現大調整，環球股市難免要經歷一輪震動。

從恒指牛熊證街貨分布睇，昨日恒指高開29,083點，已經殺了29,000至29,099點內熊仔重貨區的大批街貨，上方29,100至29,499點仍有相等於2,900張期指的熊仔等住劏，相反，牛仔最多新增街貨為28,200至28,258點，共有964張。大戶會唔會先推高大市，殺完熊再劏牛，投資者不得不防。

普拉達先行食胡

將於下周派成績表的普拉達（01913），近日接連獲大行唱好，該股昨日更升8.5%。麥格理指市場早前憂慮奢侈品市場增長放緩，但該行重申其基本面續改善，維持「跑贏大市」評級，上調目標價至43元；至於摩通則認為集團同店銷售改善，故將其評級上調至「增持」，目標價升至42元。

普拉達昨裂口爆上，惟考慮到資金炒作相關板塊通常較短癮，已持貨者應吼位食胡；未持貨者則可留意下周三公布業績後市場的反應，再作部署。

此外，福特汽車與快意佳士拿業績較預期遜色，加上中美貿易戰勢必影響汽車外銷，香港上市汽車股昨日隨大市回調，其中吉利汽車（00175）、華晨中國（01114）及長城汽車（02333）股價跌幅介乎3至5%。汽車零件股仲慘情，耐世特（01316）和敏實集團（00425）同創52周低位。行業個勢弱成咁，暫時都係避免沾手！

古勝