絲絲講場：IBM加薪定炒魷 由AI話事
打工仔依家要睇AI面色？事關AI參與公司管理，評核員工生產力，決定加幾錢人工、有冇得升職，甚至係炒邊個。
呢個係IBM員工要面對嘅現實，而嗰個AI正正係佢哋親手搞出嚟嘅IBM人工智能Watson！
預測員工未來對公司貢獻
Waston評核時，唔單止睇員工實際往績同經驗，仲會預測埋員工未來表現！換言之，你今年加幾錢人工、有冇花紅，分分鐘取決於估你出年對公司有幾大貢獻！點估？Watson會睇埋員工嘅內部培訓情況去評估。
IBM薪酬及福利副總裁Nickle LaMoreaux話，靠往績決定晉升太局限。今時今日技能嘅「半衰期」愈嚟愈短，一啲工作技能好快Out，員工尋日做到幾多，同聽日做得掂啲咩，可以係兩回事，所以佢哋睇重員工學習增值能力。
據IBM人力資源部統計，同人類評估結果比較，Waston嘅準確度達96%！照咁睇，第一個要驚嘅可能係人力資源部自己？
余絲韻