中美貿易戰未見緩和，港股繼續跟A股走，指數昨日高開低走，在低成交下呈陰乾下跌，作為港股股民，前路難行。
人仔貶值勢頭停不了，昨日離岸價一度失守6.80關，重災區繼續係中資航空股，三架飛機全線向下，中國國航（00753）、南方航空（01055）及東方航空（00670）分別跌4至5%，慘不忍睹。
古勝日前才指出港股塘水滾塘魚，資金只不過在魚缸內游走，昨日連防守力較強的內需股亦捱沽，蒙牛乳業（02319）跌3%，中國旺旺（00151）跌3%。至於早前彈得唔錯的醫藥股同樣要回，皆因復星醫藥（02196）喺淡市下伸手。反而新華保險（01336）發盈喜，刺激股價升4%，並帶動內險板塊回暖。
市底弱兼氣氛唔好，資金睇乜都唔順眼，好似吉利汽車（00175）公布以約31.7億元人仔同主席收購三家在建廠房，如果係旺市，消息必然可刺激股價，但家陣個市熊蹤乍現，吉汽昨跌3.7%。
從基本面睇，中美貿戰持續，預期內地車企雖可受惠政府加大推動內需、國策支持本地品牌等因素，但從另一面睇，則要面對放寬車市後競爭加劇，是福是禍仍需時間觀察，惟資金面對不明朗因素，通常都選擇沽貨為先。
誠言，相對於其他汽車股如長城汽車（02333）、華晨中國（01114）及比亞迪（01211）等，吉汽今轉都算跌得較少，主因在新能源汽車研發方面表現突出，相信可受惠國家推動國產品牌、汰弱留強的行業趨勢。另外，集團早前發盈喜，預期截至六月底止半年盈利將按年增加約50%，主因是整體銷量增加及產品組合改善所致。
可惜，市況唔就，真係講乜都假。走勢上，吉汽股價MACD牛叉收窄，走勢利淡，短期若失守前低位18.5元支持，跌勢有機會加速，目前非博反彈時機。
古勝