絲絲講場：貿戰打殘美豬雜 益咗喵星人
豬嘅頭頭腳腳、豬脷豬雜，喺美國一向無人吼，反而中國人食唔少，所以美國九成豬頭豬腳豬雜都係銷去中國同香港！
不過，一場貿戰搞冧生意，四月中國對美國豬肉加徵25%關稅，美國四、五月受關稅影響嘅豬肉加工副產品出口即減三分之一，今個月初中國宣布關稅再加碼，兩輪加埋令美豬關稅高達50%，肯定重創美國豬雜出口。
但咁樣其實傷唔到中國買家，佢哋隨時可轉由歐洲或南美智利巴西等地入貨。反而美國失咗中國呢個大客，美國豬雜肯定價崩，舊年仲賣緊76美仙一磅，美國肉類出口協會預計嚟緊會跌到得番18美仙一磅，即冧價近八成！美國艾奧瓦州立大學農業經濟學家Dermot Hayes料，美肉商下年會因豬雜冧價而損失8.6億美元（約67億港元）。
萬洲累挫24% 慘過恒指
亦有港股成炮灰，美國最大兼出口中國最多嘅豬肉食品商Smithfield Foods，就係萬洲國際（00288）旗下公司，雖然中美豬肉貿易業務佔萬洲盈利僅單位數字。但咁環境下，市場難免先沽為妙，萬洲股價自中國宣稱四月加徵美國豬肉稅以來，至今已挫約24%，比起同期恒指跌約7%，冧多一大截。
美國多咗咁多豬雜銷唔到出口，惟有監平賣去做寵物糧餵貓狗。美國寵物食品協會主席Dana Brooks話，見供應多咗，業界會用多啲豬雜，仲話對寵物有營養。真估唔到貿易戰竟然最終益咗喵星人同汪星人！
余絲韻