Market Insight：大市反彈乏力 隨時再調整

講真，近期一眾權重股如騰訊（00700）、建設銀行（00939）、港交所（00388）、滙豐控股（00005）及友邦保險（01299）等股價唔係話無彈過，惟動力明顯唔強，加上外圍陰晴不定，美股相對強勢，再考慮到美元中線偏強，醒目錢都寧願走去押注美股，都唔想流入相對弱勢的中港股市上。

扶持政策只聞樓梯響

講起權重股，騰訊今年走勢真係令人失望，股價六月初反彈見431.6元後就無以為繼，近期雖守住375元水平支持，但由於港股市底轉弱，睇怕股王都係冇運行。相對地，在另一邊廂的美國科技股，即使早前回軟過一輪，但好快就重拾動力，納指上周唔覺唔覺又創歷史新高。

講真，今次「侵侵」政府擺到明要阻住中國發展高科技產業，「中國製造2025」計劃更被視為眼中釘。市場早前憧憬過中央會大力推動相關行業發展，但直至現時為止仍未見有實質政策出台，加上發展高科技產業需要投入大量人力物力以及時間，並非一時三刻可以有成果。故見到早前威過一輪的晶片股如先進半導體（03355）及中芯國際（00981）等，近日股價都級級落。

至於講到有鑊氣，市場焦點一定係中興通訊（00763）同小米（01810）。美國商務部宣布正式解除對中興之出口禁令，意味可恢復正常業務。同時集團上周發盈警，預期上半年轉蝕70億至90億元人仔，被市場當成壞消息出盡而炒上。

姑勿論日後有沒有變數，此時些刻資金有理無理炒咗先講！走勢上，中興股價昨日收報16元，短期若在成交配合下突破六月十三日裂口下跌當日的16.5元高位，值得小注試買，首站睇20元，股價若跌一成則止蝕。

至於唔畀北水買住的小米，昨日開低後見承接，最終只跌1.8%，沽壓比預期細，但考慮到股價上周升咗唔少，現時先嚟買「貴米」，未必有肉食。

古勝