絲絲講場：星展50歲 伙記收利是
生日快樂！尋日係星展銀行（香港）50歲正日生日呀！星展會點樣獎勵一班喺背後默默出力嘅員工呢？ 絲絲打聽到，集團會向每個員工派500新加坡元（約3,000港元）鼓勵一番。
請全港市民搭小輪
香港大概有4,400個員工，無啦啦多封利是真係唔錯。但比起新加坡嗰邊50周年豪派1,000蚊坡紙（約6,000港紙）少咗成半喎！但絲絲八到，香港員工會獲送多50蚊嘅八達通增值。
星展今次仲請你坐艇添？！各位股民定啲，正確來講，係坐小輪。星展為推全新品牌承諾「Live More, Bank Less」，會喺八月十八日請晒全港市民免費搭天星小輪，來往中環尖沙咀及中環灣仔都唔使錢，同日仲會喺尖沙咀安排街頭快閃Busking添！
唔知Busking係乜？咁咪去睇吓囉，Live More嘛。不過敢叫人「Bank Less」，星展夠晒突破！
余絲韻