絲絲講場：內房爆改名潮 搣甩「地產」轉型

內房前景有幾淡？連萬科（02202）主席郁亮上月底喺股東會上都話：「十年後，萬科還會是地產公司嗎？我想不是了，如果還是，那也是慘淡經營了。」佢表明未來萬科要做「美好生活的服務商」，希望啲人提起萬科，唔係諗起樓。佢仲話集團個名改得好，一早叫「萬科企業」而非「萬科地產」，話打算將旗下公司名嘅「地產」二字搣走。

呢半年，唔少內房股改名唔要「地產」兩個字。朗詩綠色（00106）話公司業務已由傳統地產發展延伸至其他領域，舊名唔「匹配」。龍湖（00960）就話，改名「更符合集團長期業務策略」，合景泰富話新名「更好反映集團業務擴張策略」，時代中國（01233）就話改名「更好地反映全新公司身份及形象」。講白啲，全部都想轉型求多元化，總之唔要齋地產一味。

融資難 龍頭力保現金

內地近年「去槓桿」大環境下，地產有幾惡搞？自舊年下半年起，已頻傳出內房融資困難。早排綠城中國（03900）就爆出要求員工遵守六大政策，以加速資金回籠。碧桂園（02007）月初亦傳出叫停喺內地三、四、五線城市擴張嘅「全覆蓋」戰略，不惜放棄規模與利潤，都要保住現金流，仲傳話上月起叫停投地添。雖然碧桂園之後澄清話冇叫停過「全覆蓋」策略，但連內房股龍頭都有啲咁嘅風傳出，可想而知呢個寒冬有幾冷。

余絲韻