畀你即時加薪10%，條件係必須同時放棄一樣嘢，你估啲人願意犧牲咩呢？
金融產品平台LendEDU早排訪問咗1,238名美國打工仔，調查結果發現，佢哋為咗加一成人工，竟然可以付出咁嘅代價！大約75%人願意戒酒5年，有超過55%人話可每周額外做多10個鐘，仲竟然有近一半人話願意唔掂Facebook同Twitter呢類社交媒體5年！係真唔係呀？
好多人亦肯放棄好大程度嘅消遣活動，超過88%人話可以終身唔追《權力遊戲》（Game of Thrones，美國超級火紅嘅電視劇），甚至有五成人聲稱可以3年唔睇戲喎！
不過，更令人不安嘅係，約三分之一嘅人竟然為咗嗰10%人工，願意終身放棄投票權，有10%人甚至唔介意犧牲埋子女嘅終身投票權！真係為咗錢，可以去到咁盡？
畀着你，又願意犧牲啲咩呢？
余絲韻