絲絲講場：埃利安變埋講波佬股市點算？
呢排又貿戰又聯儲局收水又油價諸如此類，猛話環球經濟被夾擊點大鑊，絲絲夜晚收Push見安聯首席經濟顧問埃利安出Post講嘢，即撳入去睇吓佢點睇新興市場。點知，佢竟然唔係講「市場」而係「球場」！連埃利安都變埋足球評論員，喺Twitter講波多過講市，難怪世界盃期間股市無運行！
睇番今屆世界盃六月中開鑼至今，環球主要股市個個跌，恒指跌咗近8%，英、法、德股市分別跌咗約1.5%、1.6%及3.2%，美股道指跌約3.3%，日股跌咗5%！最甘係A股，滬綜指跌咗近10%！
國家隊輸波 指數翌日跌
仲有，原來國家隊輸波隨時令你炒股輸身家！英國倫敦商學院研究顯示，撇除環球市況因素，一個國家喺世界盃淘汰賽輸波，傷嘅唔止係球迷個心，該國股市仲傷，翌日通常會下跌0.5%，尤其係英、法、德同西班牙呢啲熱衷足球嘅國家，幾乎萬試萬靈。
不過，贏波又點呢？Sorry，贏波係唔會帶動金融市場做好嘅，事關球迷通常預愛隊贏，只會畀輸波嚇親激親，情緒影響埋投資決定。
高盛用數據分析貼出巴西
研究分析咗39個國家，多達1,100場球賽對股票市場影響，而得出以上結論。報告仲以上屆一四年世界盃來印證研究結果，當年英格蘭以0比1輸畀意大利，富時100指數翌日跌咗0.4%，當日全球市場表現都好平穩。另外，法國喺八強賽事中輸畀德國，法股亦跌1.4%；當西班牙以1比5大比數輸畀荷蘭時，西班牙股市就跌1%。
照咁計，若英格蘭喺世盃落敗，英國股市可能蒸發120億英鎊，即係成千二億港紙！
咁今屆世界盃又點睇？根據高盛分析（冇錯，連大行高盛都掛住個波），最大機捧盃嘅係巴西，其次係法國同比利時。喂你又點睇？
余絲韻