港股市底弱係人都知，不過所謂吊頸都要抖吓氣，昨日終於有得彈，恒指最終升141點，但國指就繼續跌，主板成交1,172億元。
周五係六月最後一個交易日，又係半年結，加埋下周一港股假期，本來已經難以刺激買貨意欲，最重要係下周五就係美國向中國進口商品加徵25%關稅的日子，之前會唔會出現變數就無人知，但點會都令博反彈資金有顧忌。
市場近期缺乏焦點，但消息指行政會議已通過三項新房屋政策，包括徵收一手樓空置稅、居屋和綠置居定價與市價脫鈎，以及將部分住宅地撥作興建公營房屋。由於上述措施將影響市場對未來樓市供應及定價的預期，加上美國加息步伐持續，故昨日本地地產股反彈乏力，特別係最受一手樓空置稅影響的幾大發展商。
近年地皮愈賣愈貴，香港新樓閒閒哋兩萬幾蚊呎，想置業人士如果冇父幹又或者唔係專業人士，要買樓已經唔係夢想而係妄想！對樓市束手無策的政府，今次又唔知係咪好心做壞事！
昨日升幅榜上，十居其九都係名不經傳的細價股，既難炒成交又奀，想諗住睇升幅榜搵食的缸邊友可以抖吓；相反，昨日港股午後即市V彈時，見部分基本面較佳的藍籌跑出，若然後市真係彈得起，相信這類股份仍值得關注。
藍籌中，「三桶油」近期跑贏大市，主要原因包括有早前油組增產協議的產量少過預期、市傳美國要求其他國家停止從伊朗進口石油，加上美國上周原油庫存大減近千萬桶遠超預期，刺激周三紐約期油一度高見73.06美元。
策略上，對油價最為敏感的中國海洋石油（00883）近期累升不少，但考慮到港股氣氛仍淡，資金或傾向追入基本面利好的石油股。不妨順勢買入中海油，首站目標14.64元，止蝕12.8元。
古勝