當全球波友都睇緊世界盃之際，唔經唔覺港股已經跌到落牛熊分界線水平。古勝相信去到呢個位唔多唔少都會反彈吓，惟彈完後係重返早前橫行區間內，抑或今轉係最後逃生門，咁就真係惟有做事後孔明。
睇番昨日能逆市突圍板塊，多數係受中美貿易戰影響較微同埋有個別利好因素支持的股份，例如晶片股因市場預期行業未來受惠於國策傾斜而做好，先進半導體（03355）、中芯國際（00981）及華虹半導體（01347）升幅介乎3至9%。雖然內地晶片業長遠發展係有一定憧憬，惟相信資金只係借勢短炒，搭咗轉順風車的股民要記得落車。
日本眾議院早前通過賭場法案，最快本周交參議院審議。消息一度刺激彈珠機股，但昨日走勢個別，NIRAKU（01245）升15%創去年十一月以來高位，而OKURA（01655）微升0.8%，DYNAM JAPAN（06889）則跌4.3%。
雖則話日本今次有機會開賭，但要留意，根據賭場法案將批准在日本興建3間賭場，而日本人及現居日本的外國人將徵收6,000日圓入場費，並限制日本人進入賭場次數。
就咁睇，開賭後盈利能否大增，帶動彈珠機股業績，確實存在一定變數。仲有係，呢類股通常炒作時間甚短，升勢往往曇花一現，故若早兩日冇入貨，到依家才行動的話，隨時會成為音樂椅遊戲下的輸家，真係要諗清楚。
反之，年內表現強勢的醫藥板塊，近期因多隻股份向市場伸手影響氣氛而要抖氣，惟部分個股跌勢喘定後已現反彈。要配股的公司可能都已經出咗手，故有條件作短線出擊。其中金斯瑞生物科技（01548）及三生製藥（01530）股價近兩日分別於21元及18.5元水平見支持，短期若能守穩其上，可短炒一轉，一旦跌穿支持位即止蝕，風險有數得計。
古勝