絲絲講場：Fit爆夏佳理去生日派對

港交所尋日「18歲生日」，前主席夏佳理都有嚟畀面派對，冇見佢一排，成個身形Fit咗，又精神飽滿。原來夏佳理之前用咗半年時間Keep fit！

絲絲都想知佢用乜方法咁見效？夏佳理話，佢九成半時間冇食澱粉質如米飯，每餐仲只食七成半飽，結果就係咁！絲絲決定今日開始即刻試夏佳理餐單！

對於小加總裁續約三年，當年有份拍板小加做CEO（行政總裁）嘅夏佳理話，小加續約梗係好事，又話佢都做得幾好！至於港交所推出新上市制度，容納「同股不同權」公司，夏佳理就話，「終於」都推出，佢話以前其實都有諗過吓，新經濟係大勢所趨，係不可逆轉嘅潮流！

除咗夏佳理，絲絲尋日發現專打老虎嘅證監會法規執行部執行董事魏建新都Fit咗好多，原來佢去做Gym，瘦咗五十磅！睇嚟金融界猛人都想夏日以最佳狀態示人！

余絲韻