絲絲講場：李小加獲港交所續約 估年袋逾四千萬

又因為小加嘅集團行政總裁身份，所以同時亦係董事會當然成員，任期同佢僱用年期相同。

小加尋日喺港交所上市18周年酒會話，喺港交所工作近九年，港交所係佢最熱愛嘅工作，冇其他工作更能發揮貢獻咁話。

加人工3.5% 每年底薪931萬

小加嘅新人工係每年931.5萬元，比起之前年薪900萬元加咗3.5%。不過咪以為佢只係得嗰九百零萬落袋，佢個報酬Package，其實仲有其他福利、公積金、酌情表現花紅同獎授股份，咁即係有幾多？

嗱，睇番港交所公布，舊年小加除咗年薪900萬元外，另外仲有其他福利40.2萬元、退休福利112.5萬元、現金花紅1,500萬元咁，加埋已經有成2,552萬幾元！咁仲未止，另外仲有筆2,332萬元嘅股份獎授福利，換言之，舊年佢總共有成4,885萬落袋！

小加喺○九年十月加盟港交所，一○年一月十六日起出任CEO兼執行董事。聽講佢當年去港交所面試時，當時係港交所董事嘅史美倫亦有份Interview佢，早排史美倫獲委任為港交所主席，小加仲話同史美倫係「一見鍾意」添。今次續約，史美倫話對小加有好高期望，望佢及其他管理層一同努力，帶領港交所更上一層樓咁話。

絲絲又記得，上個月「2018第四屆投資者關係大獎」典禮，小加一聽到港交所拎到「整體最佳投資者關係公司大獎」，人家都未準備好頒獎，佢就飛身衝上台，搞到要行番落台，全場爆笑。為公司咁落力，抵佢賺嘅。

余絲韻