華為總裁任正非日前透過內部電郵，提醒員工們要警惕，小心華為有中年危機！
呢封電郵可謂別開生面，任總將華為所處嘅ICT（信息通信）行業大致按年齡分三個輩份，爺爺輩嘅愛立信、諾基亞等成百幾歲，而IBM就快107歲，惠普都有79歲；大叔輩嘅有三個70後和兩個80後，包括微軟、蘋果公司和甲骨文依次喺一九七五、七六、七七年成立嘅，另外仲有八四年成立嘅思科同八七年成立嘅華為。
最後一個輩份則可稱為小鮮肉輩，包括Facebook、亞馬遜等，全部都係二○○○年後先成立，到依家仲未夠20歲。任總從中仲發現到小鮮肉們普遍好值錢，度過咗中年危機嘅大叔們亦好值錢，但係爺爺們就多數唔太值錢。
任總話華為創立已超過三十年，依家面臨緊中年危機，內部因經營規模擴大，管理複雜度提升，唔會創造價值嘅嘢增加，邊際效益遞減中，新商業模式層出不窮等，都不斷對華為構成威脅。所以如華為想活過百歲，就先要度過中年危機！各位華為工友，明白未？
余絲韻