絲絲講場：四叔唔見傳媒原來有特別任務！

忙住同股東影相

二公子李家誠話，四叔今年仍然有主持股東周年大會，無退休打算，不過因為有好多股東想同佢影相，無辦法分身，所以咪派恒地三位副主席出嚟招呼傳媒朋友。絲絲喺會場外擸過眼，出席嘅小股東人數眾多，怕且四叔齋影相都有排忙！

問兩位李公子有無準備接棒，佢哋只係話每一間公司都有唔同嘅分工，公司業務同分工上暫時未有太大改變，如常運作。話雖如此，明眼人一睇就知佢哋早有部署。

皆因恒地上年股東周年大會係四叔首次無見記者，大家當堂嚇一跳，不過老臣子林高演當時立即解畫，原來係想畀兩位公子多啲接觸傳媒，睇怕今年情況都一樣。

至於集團喺分工上面，無論問到香港樓市定係集團本地業務，全部一律由李家誠回應。相反，大公子李家傑就只係集中講解集團喺大灣區會爭取加快布局，睇嚟恒基中港業務嘅分工已經好清楚啦！

余絲韻