Market Insight：醫藥板塊有國策光環

A股入摩前夕，MSCI指數成分股變動，港股出現賓墟場面，成交激增至2,037億元，股王騰訊（00700）一度重返400元樓上，U盤後收399.2元，升1%。穆迪上調內銀股評級，建行（00939）、工行（01398）分別升1.2及1.4%。

成個世界沽股、沽匯、沽商品，連日risk off之後，終於見油價技術反彈，上星期在沙特與俄羅斯忽然增產拖累油股，昨日中石化（00386）彈6%，是表現最佳藍籌，中石油（00857）及中海油（00883）亦有3.3%及2.4%進帳。

龍頭股備受追捧

藥明生物（02269）、金斯瑞生物科技（01548）、中國生物製藥（01177）及石藥集團（01093）幾隻今年走勢反地心吸力的基金股，昨日都見大成交下落鑊炒。下周一石藥正式染藍，儘管恒指公司自五月初公布至今，已經將個價推高唔少，惟早兩日出的首季業績確又對辦，新藥收入比例增加，毛利率改善，純利大升四成二至9.1億元，無乜可以挑剔的地方。

街外估石藥今年賺36億至41億元，以1,532億元市值，市盈率至少37倍。不過，今時今日賓架深信，中國醫藥有國策光環照住，配合14億人口市場，未來五至十年好大機會發展出中國版本的輝瑞及默克。膽小鬼遊戲大家夠唔夠膽玩是後話，但大氣候之下，內地幾隻醫藥龍頭股，在資金催谷之下，相信會易升難跌。

國際金融大鱷索羅斯警告話，意大利隨時發展成大型金融危機。大摩CEO James Gorman話索老講法不切實際，呼籲散仔唔好被市場波動迷惑，一場金融大孖沙口水戰率先開打，最後邊個啱，惟有等歷史話畀我哋聽。

投資者傾向揀擇

過去二十年，出現過亞洲金融風暴、科網股災、美國次按風暴及歐債危機，次次講到史無前例，誇張啲直頭話摧毀人類金融歷史，最後都大話夾好彩，鋪鋪大步檻過，久而久之，投資者對乜乜危機、咩咩風暴好似產生抗體一樣，每次市場打兩個冷震，隔一陣就無事。

唔信？睇番英國脫歐，無令歐盟解體，歐元區經濟唔算好好但至少無出現崩潰；到「侵侵」勝出美國總統大選，美元美股甚至跌唔夠兩日已掉轉頭炒。意大利危機會唔會只係小菜一碟？始終環球股市處於相對高位，美國收水催生的強美元環境，開始逐步影響新興市場，息口不再是零，投資者開始傾向揀擇。

今年港股有波幅無升幅，已經證明同一七年買咗坐定定等派彩的市況好唔同。點都好，睇唔通揸現金，呢句投資自保金科玉律，幾時都啱用。

古勝