絲絲講場：想同股神食晏 至少2500萬

金融恐慌要「求神」 Bid價飆升

根據過往經驗，股神午餐拍賣成交價通常都會喺臨結束前飆升。依家離拍賣完結仲有成日，斷估今年成交價勢必打破歷年嘅紀錄！呢個被譽為「世界上最貴的午餐」絕對唔係浪得虛名，其中喺一二年同一六年所創下嘅拍賣成交價，就同樣為345.6萬美元（約2,695萬港元）成歷史最高，而上年午餐拍賣價就係267.9萬美元。今次出價升得咁快，唔通係因為近期金融危機言論充斥市場，例如之前對沖基金大鱷索羅斯就警告喺意大利政局動盪下，歐盟面臨解體風險，仲講到言之鑿鑿咁，令到好多投資者都想請教股神指點迷津？

講番股神午餐，其實係同巴菲特喺紐約曼哈頓知名牛扒餐廳Smith & Wollensky共進午餐三個鐘，呢場活動始於二○○○年，直到依家都有成十八年歷史，今次拍賣所得款項將會悉數捐畀位於三藩市嘅慈善機構格萊德基金會（Glide Foundation），主要係用嚟幫助當地嘅窮人同無家可歸者。

按照慣例，巴菲特將會同勝出拍賣者及佢最多七位親友共進午餐，到時大家傾咩都得，但係股神就唔會透露自己下一步嘅投資目標。

余絲韻