Market Insight：聯想集團尋求新轉機
港股成交淡靜，從近期大市交投而言，算係應驗咗「五窮」的「窮」﹗呢期國際政經事件頻生，大家都對六絕月有戒心。事實上，A股即將入摩，但A股表現仍然依舊疲弱，短期市場缺乏利好消息。既然冇咩目標，選擇少做少錯亦可理解！
恒指昨日收市唔見三舊，收報30,484點，都喺上落區域內，冇咩特別。論板塊，繼續係內需、教育、醫療等不受外圍因素影響的板塊輪流接力炒作。就如昨日醫藥股同教育股抖氣，又輪到內需概念如食品股接力。
事緣康師傅控股（00322）公布的季績靚仔，首季賺7.12億元人仔，增長64%，毛利率上升1.62個百分點至29.66%，故獲多家大行唱好，股價逆市上升逾半成，突破雙頂阻力。只是考慮到市況偏軟，短線高位有獲利回吐都唔出奇，但守得住16元樓上，又可以翻兜，目標年內反覆向20元關進發。
內需股係時候翻炒
同類股中，中國旺旺（00151）下周派成績表，昨日亦升近半成。同係炒行業復甦概念，旺旺股價表現相對落後。不過，論估值，7元邊上車的值博率會較吸引，反正依家唔係咩大旺市，古勝會選擇等一等再睇位跟進。
市場消息指內地擬增加從美國進口煤炭，以縮減中美貿易逆差。查實這些年內地煤炭業一直在努力去產能，今年煤價算係好番啲，如果加大從美國進口煤炭，即使係針對高質煤炭，整體供應量增加，對煤企自然唔係好消息，但具運煤能力的航運企業就多咗生意做。到底個消息係咪真，不妨等着瞧！
聯想集團（00992）話正考慮研究回歸A股，不排除透過CDR形式或分拆業務在內地上市。事實上，呢幾年聯想的發展令唔少小股東失望，即將被剔出藍籌成分股也許就是結果。
究其原因，營運表現缺乏持續性係一個問題。再講，集團未能將個人電腦業務的成功擴展至其他高增長領域，移動及數據中心業務始終未能擔大旗，而在設備+雲服務方面的投資龐大但成效仍有待觀察，股價低迷必有因。
分拆業務或有刺激
作為一個內地知名的電子消費品牌，聯想的發展應該可以更好。去年曾傳出聯想或進行私有化，畢竟股價如此疲弱，維持上市在融資及市場形象方面似乎都未見太多好處，反正大股東聯想控股（03396）已在港上市，私有化聯想集團，未嘗不是一個減低營運成本同以便進行更大幅度改革的選擇，相信如今會睇埋回A或分拆業務的可能性，再一併考慮。
若係長情小股東，反正去到呢啲位，唔想「斷臂」，唔爭在等多半載，睇吓有冇轉機。
古勝