絲絲講場：新地樓盤大搞園景
新鴻基地產（00016）執行董事郭基煇（Adam）原來對園景設計都好有研究，新地樓盤嘅園景設計佢都會親力親為，好似元朗錦田北PARK YOHO嘅「候花園」咁。佢同絲絲講，籌備中嘅西貢十四鄉大型住宅項目可建樓面近500萬方呎，嗰度有排發揮，一定會花更多心思，希望可將會所室外空間打造成婚禮場地，係咪好浪漫呢！
其實Adam細細個成日跟爸爸去地盤，對起樓極有興趣，依家自己落手落腳去策劃，由項目開發到項目落成，佢同絲絲講超有成功感！
幫小朋友發掘潛能
日前Adam出席新地贊助嘅「資優科學創意發展計劃」，該計劃目標係培育一班基層小朋友，幫佢哋發掘潛能。
Adam又話，近年香港行業發展趨勢有好大改變，喺自己嘅年代（80後），大家都會覺得畢業後要做投行、律師，甚至醫生先叫叻，但今時唔同往日，好多高材生都會選擇創業，或者進身科技行業，未來大趨勢都會係圍繞住科技，好似新地呢啲傳統地產發展行業咁，以前就話用紙去畫圖則，依家就會用電腦，直接畫個3D立體圖嘞。
余絲韻