絲絲講場：羅傑斯快樂投資娶村姑！
「商品大王」羅傑斯一向係中國「大好友」，又睇好農產品價格，最近佢接受Stansberry Churchouse Research訪問時，話會繼續伺機買入中國股票，更笑言投資者若要尋找新生活，可考慮喺中國買入一幅農地轉做農夫，然後娶一名懂得耕種嘅村姑做老婆，咁你就會「very very happy」（十分、十分快樂）!
佢仲話，中國政府向來都積極協助當地嘅農夫，而即使世界末日來臨，農產品絕對可拯救大家。繼過去一個世紀，市場聚焦「美國故事」，未來十年中國將會崛起，其中「一帶一路」將會係一個好大嘅機遇，情形就好似500幾年前西班牙同葡萄牙出海尋找航海路線，又或者係百多年前美國鐵路發展，催生咗好多沿線嘅大城市，如芝加哥及丹佛市等。
羅傑斯又話，現時中國及日本股市比歷史高位分別低40%及50%，因此睇好中國及日本股票多於美國及德國股票，亦看好越南市場發展，而長遠具保值功能嘅黃金，都可以考慮放入退休基金。
薦買內地北韓農地
講到買「磚頭」，佢就話唔會喺紐約或香港買樓，認為紐約、倫敦及中國青海等都係「泡沫」城市，其中紐約及倫敦嘅樓價已開始向下。
不過，佢建議投資者可考慮喺中國中部、北韓買入農地，雖然現時北韓尚未開放，但佢憧憬未來南、北韓最終有機會統一，所以買定啲大韓航空股票及安碩MSCI南韓指數嘅交易所買賣基金（ETF）。
余絲韻