孖妹S檔案：美債息飆升 未驚過？

富：「債券天王」 富斯（Dan Fuss）

王：星展銀行（香港）財資市場部董事總經理 王良享

黃：天達全方位中國債券基金投資組合經理 黃志忠

債券天王 未見爆煲 長息睇5厘

Kitty：美國十年期國債孳息率喺上月底升穿3厘關口，係繼一四年一月後再次破關，所以備受關注。記得年初新舊債王都提過，債息升穿3厘，債市牛市就會終結。

富：我唔覺得全球債市會爆煲，依家係債市準備膨脹嘅階段。

彩兒：膨脹？即係債息會繼續向上，但又唔使驚？

富：我預期美國債息喺未來幾年都會繼續飆升，短期債息會升到3至3.25%，十年期國債孳息率會高達4至4.25%，長債息會先漲至4.7%，再飆至5%。

美國聯儲局加息，係期望美國國債孳息率正常化。過去美國債息一直處超低水平，依家係時候升番去正常水平。至於咩係正常水平，冇人知，連聯儲局都唔知。

Kitty：唔怪得知，聯儲局議息結果及聲明，次次都萬眾期待，仲會影響全球股市表現。若我事先捉到路就好喇。

富：聯儲局決定加唔加息，會審慎考慮以下原因：第一，提高中小型銀行嘅收益穩定性。提高短期債息，令中小型銀行更容易吸引存款；第二，壓抑通脹；第三，增加就業，聯儲局非常留意通脹率，即消費者物價指數，以及就業率，以確保美國經濟形勢樂觀；一旦見到通脹率及就業率未達標，就會即刻叫停加息；第四，有備無患，提高債息，將來股市有咩冬瓜豆腐，都仲可以減息應對。

「債券天王」富斯表示，聯儲局加息是期望美國國債孳息率正常化。	星展王良享建議投資者留意債息水平及加息步伐。	天達黃志忠表示，中國十年期在岸國債比其他國家國債有更高流動性及回報。

睇市場反應判斷危機

富：此外，若突然有大量資金流入美元債券或外圍環境，包括中美貿易談判上有咩變數，都會影響加息步伐。對於加徵關稅，即使話貿易限制可以推高通脹，但導致失業率飆升，都會令聯儲局加息步步為營。

彩兒：新鮮出爐嘅聯儲局會議紀錄提到，喺美國經濟持續穩健增長嘅背景下，美國通脹可能會略高於2%一段時間。

Kitty：呢啲貼士唔算數，加唔加息都仲係唔清晰。

富：等我畀啲小錦囊你喇。目前，最令聯儲局擔心嘅係，有國家借入例如美元等Hard Currency（強勢貨幣），但收入主要嚟自自己國家貨幣等Soft Currency（弱勢貨幣），佢哋就會蝕咗匯價。

彩兒：我更關心債市有危定有機。

富：咁就要睇債息向上時，投資者嘅反應。若見投資者係靠借錢買短債，咁就十分危險。佢哋要承受高利率風險。

Kitty：我知，因為債券回報早已鎖定，若市場利息上升，貸款利息有可能增加，債息收入未能抵銷借貸成本，可能會倒蝕。

富：另邊廂，若債息喺幾年之間緩步向上，而投資者已鎖定借貸成本，咁隨着再投資率提高，投資組合收入就會逐步增加。對於長線投資，例如壽險及養老金等，呢個就應該係好消息。不過，對大部分投機者嚟講，就當然係壞消息。

銀行界預測 倘漸進加息 股市料無礙

彩兒：債券天王淡淡定話十年期國債孳息率會升到4至4.25%，無有怕喎。不過我都仲係驚驚哋。

王：睇債息水平，更重要係要知道加息幾多次，同埋加得幾快。若每次加息0.25%，今年加多三次，明年再加三次，咁明年底短期債息觸及3.25%，以呢個漸進步伐加息就唔擔心喇。至於十年期國債孳息率升上4%，我覺得需要一段較長時間，因美國人仍有大量現金儲喺銀行，美國銀行體系結餘充裕，所以聯儲局唔買債，銀行自己都可以買。

Kitty：技術圖表顯示，十年期國債孳息率由四月中到依家一直徘徊喺3%附近，按照呢個趨勢，嚟緊唔似會急彈。

王：另外，中美貿易談判中，徵收關稅似靠嚇多。最近雙方似有談和迹象，十年期國債孳息率一度跌番去3%以下。

若十年期債息為4%，通脹率為2.25%，即實質利率1.75%。以3%經濟增長當作企業盈利，扣除1.75%長債實質利率，就是股市風險溢利。呢個算式話你知，若經濟增長達3%，而通脹合乎市場預期，即實質利率未升太高，股市風險溢利仍吸引，股市就不會出現太大危機。目前香港仍維持零利率，外匯基金票據孳息率逾2%，與通脹率相近，因此港股未見太大壓力。

美企盈利撐起市盈率

彩兒：有咁多假設，係咪市場嘅不確定性比以前大？

Kitty：量寬為市場泵錢，推高物價，經濟貌似蓬勃；但緊接住嘅緊縮政策，就會將之前嘅假象抹去。

王：又唔係噃，前景可期！美國經濟近年有明顯復甦，美企盈利增長由一一至一五年嘅單位數增幅，到一六至一七年嘅雙位數增幅；有實際盈利支撐市盈率，投資風險自然降低。加快美企盈利增長嘅主因，係特朗普喺去年十二月提出嘅稅改方案，企業稅由35%大減至21%。嚟緊特朗普仲會推出唔少刺激經濟政策，包括撤銷部分監管及推各項基建投資項目，呢啲都會成為美國企業盈利強勁增長嘅催化劑。

彩兒：萬一呢啲政策谷唔起經濟點算？

王：股市就會跌。

基金分析 在岸國債風險低回報高

彩兒：中國債券前景如何？

黃：唔好睇小中國債市，佢係全球第三大債市。由一四年初至一七年底，投資中國債市嘅外資增加三倍，達二千億美元。去槓桿同有質素嘅經濟增長，令中國十年期在岸國債比起其他國家國債有更低波幅風險，及更高流動性及回報。

睇全方位 忌望一板塊

Kitty：中國美元債券嘅投資風險又點？聽聞美元過分轉強會影響新興市場成長。新興市場發行嘅外幣債券，大部分都係美元債，當中明年中國到期嘅美元債券總額居新興市場之冠。面對美國利率上升、美元升值，而自己嘅貨幣相對轉弱，會增加償債壓力。首當其衝係債務期限較短、財政規模較細嘅新興市場經濟體，再融資成本大增。

黃：無錯，所以投資中國債券要全方位，唔好單睇一個板塊，除咗中國房地產債券有投資價值，中國其他在岸國債都唔錯。另外，唔使太擔心人民幣年內升咗咁多，快出現回調，因中國債券基金唔一定以人民幣計價。況且，我中線仍睇好人民幣，因貨幣反映國家出口嘅商品及服務價值，而中國愈嚟愈重視出口貨嘅附加值。

內地銀行債券值博

彩兒：中國債市違約漸增，內地去槓桿政策令部分小型企業面臨流動性問題，你唔擔心咩？揀穩健嘅國債係咪最好？

黃：我哋客戶都非常留意在岸債券違約及流動性問題，所以主要揀啲較高評級及高流動性，以及能反映內地經濟增長及通脹嘅債券，包括國債及銀行債券。

Kitty：有分析員指，債券違約係中國債市走向正規必須經歷嘅陣痛過程，所以唔需要過分擔憂中國債市爆煲。

彩兒：美國國債孳息率急升，為全球債券市場重新定價。新興市場嘅國債，認真危機四伏。

Kitty：個個跑去買美債，新興市場債唔被拋售就奇。阿根廷就係一個例子啦！佢身陷經濟危機，就算大幅調升息率，仲花以十億美元計嘅外匯儲備入市，但都阻止唔到阿根廷披索狂貶值。

彩兒：不過，美債嘅吸引力亦受質疑。德意志銀行早前警告，由於美國財政赤字大幅增加，貿易逆差持續上升，美國或會陷入債務危機。美國之前量寬都仲話可以透過印銀紙解決還債問題；到依家各國收水，市場對美債需求自然減低，供過於求之下，美債債價下跌，將會推高債息。一旦債息急升，股債仲唔爆煲咩。

Kitty：債市，唔易玩！

彩兒 Kitty