Market Insight：細價股落入惡性循環
中美貿易角力過後，見唔見金仔又成為市場新謎團。環球股市被「侵侵」牽着鼻子走的遊戲，股民唔厭芬佬都嫌煩，咁落去成交愈玩愈縮的港股，真係可以提早抖暑。
上周五恒指跌172點報30,588點，收在兩周低位，全個星期累積跌459點。唔經唔覺，大市困守29,500至32,000點之間經已三個多月。從一七年長升長有，有重磅股在手賺錢易過借火，到一八年炒股唔炒市，資金在不同板塊之間流轉速度加快，走資下融資成本回升，說明今年上半年再唔係一個易搵錢的年頭，股民只能持盈保泰，孖展可免則免，在個個星期有股仔被斬之下，細價莊家股更要避之則吉。
新股質素每況愈下
港交所（00388）加快清理殭屍股，若公司持續停牌18個月（創板股只得12個月）可被強制除牌，對於真係咁唔好彩，揸住「長停公主」等白武士打救的半死殼股投資者極為不利，隨時連最後逃生機會都無埋，一旦被強制除牌連渣都冇。
唔講或者唔覺，香港為要追逐全球最大集資市場目標，近年新上市公司質素確實一蟹不如一蟹。存心上嚟賣殼還算有良心，唔少上市無耐營運狀況即大走樣，股民萬一買中財政忽然出問題公司，要搵人打救，仲要傾掂債權人，唔好講話18個月，隨時兩年都未必夠，推新例的話，只怕冇乜人吼的細價股隨時會更加靜局。
香港人愈住愈細，愈住愈貴，早已舉世聞名。三、四百呎新樓賣上千萬唔再係新聞，依然有買家前仆後繼，只能怪大家食得鹹魚抵得渴，係要追求發展商為樓盤綁上寫住尊貴豪宅的蝴蝶絲帶同包裝，最後原來只係住喺屋邨或者車來車往的大馬路旁。
近日黃大仙自由轉讓公屋成交價逼近六球，睇番六合彩頭獎基本獎金都只係八球，難怪公屋輪候申請逼近28萬個，差不多等於每9個香港家庭，就有1個排緊隊。在寸金尺土、生活逼人的香港，原來抽到公屋，一個社會對基層市民基本要有的安全網，經已同中正六合彩頭獎睇齊！樓市有幾黐線，政府在房屋政策有幾不濟，已非文字所能形容。
樓價凸顯貧富問題
最近睇到美國科技巨企林立的西雅圖，市政府開始向大公司徵收每位僱員275美元的人頭稅，因為當地貧富問題不斷惡化，科技公司員工搵錢容易，形成樓價及租金高昂。當地每晚點算，有過萬露宿者瞓街、瞓車場、瞓地盤，迫使政府不得不出手解決。古勝想起，當香港劏房、棺材房租金升到連有工做的都住唔起會點，五月已經日日三十幾度！街都唔係人人瞓得起！
古勝